Radio de A Lama: “Unha xanela máis aberta á sociedade”

Só faltaban uns minutos para as cinco da tarde e a tensión xa sentía no ambiente. Os cinco reclusos que integran o equipo de redacción e producción desta nova emisora “A Radio” esperaban impacientes a chegada do subdelegado do Goberno, Delfín Fernández, e do director da prisión, Juan Antonio Gómez Novoa. E tamén, como non podía ser doutra maneira, a dos membros de Agareso, que acudimos ata alí para arroupalos nun día tan especial.

A atmósfera relaxouse coa chegada dos invitados. O subdelegado do Goberno, acompañado polo director do centro penitenciario, chegou ao estudio de radio e despois de saudar a tódolos alí presentes, sentouse ante o micro para responder as preguntas dun dos internos. A evolución das prisións, a crisis, a función do seu cargo, e incluso os seus propios gustos musicais foron algunhas das premisas que lle plantearon a Delfín Fernández. Nun estudio máis cheo do habitual, pola presencia de diferentes medios de comunicación, o subdelegado amosou unha gran satisfacción por ser invitado á inauguración dunha grande iniciativa, como é esta emisora “que fai que as vidas dos presos sexan máis dignas”, afirmou.
Ao seu carón, o director Juan Antonio Gómez, orgulloso do esforzo adicado a por en marcha a emisora, tanto por parte de Agareso como da Fundación Barrié de la Maza, asegurou que “é unha
xanela máis aberta á sociedade. A prisión de A Lama intenta que no exterior se coñeza a realidade das cárceres”.

Ileana Gheorge, Paco Merchán, Raúl Seisdedos, Iván Aluja y Toni Dacuña son os cinco internos que dende os micros deste estudio de radio tentarán entreter e informar aos seus compañeiros. De momento o seu programa estrela é “Al son de la cárcel”, que se emite polas mañás, entre as 10 e as 12.45 horas. Trátase dun magazine no que se ofrecen as novas máis destacadas do día, acompañadas de grandes doses de humor. “Tentamos facelo ameno e divertido, para que os nosos compañeiros se rían” explica Merchán.
Para Toni, o máis veterano neste medio e o encargado do control da emisora, a “radio ten un grande valor”.

Esta nova canle de comunicación, que emite dende o 88.0 da FM para todo o centro peninteciario, 1.650 reclusos e os funcionarios, e a localidade de A Lama, xa se pode escoitar de maneira continuada, as 24 horas do día. Na súa parrilla de programación tamén hai cabida para as tertulias semanais que dende dous anos ven realizando Agareso na cárcere. Agora poderán escoitarse en “A Radio” tódolos xoves a partir das seis da tarde.

No xérmolo desta emisora, Agareso ten un especial protagonismo. Dende hai case un ano, un grupo de xornalistas da ONG Reporteiros Galegos Solidarios imparten obradoiros de formación sobre a radio aos internos. Nas clases, os alumnos adquiren nocións de locución, programación e contidos, e aprenden a diferenciar os xéneros radiofónicos. Tamén foi esencial para facer realidad esta iniciativa o apoio económico da Fundación Pedro Barrié de la Maza para dotar da tecnoloxía básica á emisora “A Radio”.